Umfjöllun: Valur glutraði niður unnum leik gegn ÍBV

Eyjamenn fengu sín fyrstu stig í Pepsi-deild karla í kvöld eftir 1-1- jafntefli við Val að Hlíðarenda í kvöld. Eyjamenn geta verið virkilega sáttir með stigið enda léku þeir manni færri meginþorrann af leiknum.

Leikurinn byrjaði fjörlega og bæði lið léku léttleikandi knattspyrnu. Valsmenn voru skeinuhættari og líklegri til að skora. Á 22. mínútu urðu Eyjamenn fyrir blóðtöku þegar Yngvi Magnús Borgþórsson fékk að líta rauða spjaldið fyrir að verja boltann á marklínu með hendinni. Magnús Þórisson, dómari, dæmdi réttilega vítaspyrnu og sendi Yngva Magnús í bað fyrir annars lipra markmannstilburði.

Albert Sævarsson varði hins vegar glæsilega frá Hauki Pál Sigurðssyni sem steig á vítapunktinn. Valmenn voru hins vegar ekki lengi að bæta fyrir það þegar Atli Sveinn Þórarinsson hamraði boltann í netið af stuttu færi eftir einbeitingarleysi í vörn Eyjamanna í næstu sókn.

Nú héldu flestir að eftirleikurinn yrði auðveldur fyrir Valsmenn en svo var nú aldeilis ekki. Eyjamenn efldust við mótlætið og náðu að jafna leikinn, gegn gangi leiksins eftir hrikalega varnarmistök hjá Val. Martin Pedersen átti slaka sendingu tilbaka sem Denis Sytnik komst inní og labbaði nánast framhjá Kjartani Sturlusyni í marki Vals. Ódýrt mark svo ekki sé meira sagt.

Eyjamenn mættu þéttir fyrir í seinni hálfleik og stilltu upp varnarmúr á Vodafone-vellinum. Valsmönnum gekk illa að komast í góð færi og ekki var sami bragur á liðinu sem lék glimrandi vel gegn Íslandsmeisturum FH. Ian Jeffs og Arna Sveinn Geirsson fengu hættuleg færi en Albert Sævarsson átti sérlega góðan dag og sá við þeim.

Hættulegasta færi Eyjamanna fékk James Hurst, nýr leikmaður Eyjamanna, en hættuleg aukaspyrna hans var vel varinn af Kjartani Sturlusyni í marki Vals, sannkölluð sjónvarpsvarsla.

Arnar Sveinn var sérlega ógnandi og átti fínar rispur hjá Valsmönnum. Albert Sævarsson var besti maður vallarins en hann hélt Eyjamönnum inní leiknum með góðum vörslum. Nýju útlendingarnir hjá ÍBV virðast einnig passa vel inn í liðið.

Jafntefli voru í raun mjög sanngjörn úrslit í þessum leik og Eyjamenn sýndu að barátta og liðsheild fer langt í knattspyrnu. Valsmenn geta hins vegar verið ósáttir enda voru þeir með leikinn í hendi sér eftir að hafa komist yfir og orðið manni fleiri.

Valur-ÍBV 1-1

1-0 Atli Sveinn Þórarinsson (24. )

1-1 Denis Sytnik (43.)

Áhorfendur: 1.038

Dómari: Magnús Þórisson 7.

Skot (á mark): 10-8 (6-5)

Varin skot: Kjartan 4 – Albert 3

Horn: 10-2

Aukaspyrnur fengnar: 15-15

Rangstöður: 3-1

Valur (4-5-1)

Kjartan Sturluson 7

Stefán Eggertsson 6

Reynir Leósson 6

(74. Greg Ross -)

Atli Sveinn Þórarinsson 7

Martin Pedersen 5

Arnar Sveinn Geirsson 6

Ian Jeffs 6

(72. Jón Vilhelm Ákason 6)

Haukur Páll Sigurðsson 6

Baldur I. Aðalsteinsson 6

( 84. Hafþór Ægir Vilhjálmsson -)

Rúnar Már Sigurjónsson 6

Danni König 6

ÍBV (4-5-1)

Albert Sævarsson 7 - Maður leiksins

Eiður Aron Sigurbjörnsson 6

Yngvi M. Borgþórsson 5

Andri Ólafsson 6

Matt Garner 6

Tonny Mawejje 5

Finnur Ólafsson 6

(70. Ásgeir Aron Ásgeirsson 6 )

James Hurst 7

Þórarinn Ingi Valdimarsson 6

(84. Eyþór Helgi Birgisson -)

Tryggvi Guðmundsson 7

Denis Sytnik 7

(43. Rasmus Christansen 6)

Leiknum var lýst beint á Boltavakt Vísis og Fréttablaðsins. Til þess að sjá lýsinguna þarf að smella hér: Valur - ÍBV