Þessi lið eru komin áfram í Meistaradeildinni

Tólf lið eru komin áfram í 16-liða úrslit Meistaradeildar Evrópu en fimmtu umferð riðlakeppninnar lauk í gærkvöldi.

Aðeins fjögur sæti eru því eftir. Spennan er mest í H-riðli þar sem þrjú lið eiga enn möguleika á að koma sér áfram en annars er barist um annað sætið í D- og E-riðlum.

Lokaumferðin fer fram dagana 7. og 8. desember.

A-riðill:

Tottenham og Inter eru örugg áfram en þar sem bæði lið eru með tíu stig verður spennan í lokaumferðinni um hvort liðið taki toppsætið. Verði liðin enn jöfn að stigum verður Tottenham á toppnum vegna betra markahlutfalls í innbyrðisviðureignum.

Lokaumferðin:

Twente - Tottenham

Werder Bremen - Inter

B-riðill:

Schalke og Lyon eru örugg áfram. Schalke er með tíu stig en Lyon níu og því baráttan enn opin um toppsætið.

Lokaumferðin:

Benfica - Schalke

Lyon - Hapoel Tel-Aviv

C-riðill:

Manchester United (13 stig) og Valencia (10 stig) eru örugg áfram. Þessi lið mætast á Old Trafford í lokaumferðinni og ef Valencia vinnur þann leik hirðir liðið toppsætið af United.

Lokaumferðin:

Manchester United - Valencia

Bursapor - Rangers

D-riðill:

Barcelona er búið að vinna sigur í riðlinum og baráttan um annað sætið stendur á milli FC Kaupmannahafnar (7 stig) og Rubin Kazan (6 stig).

Lokaumferðin:

Barcelona - Rubin Kazan

FC Kaupmannahöfn - Panathinaikos

E-riðill:

Bayern München er sömuleiðis búið að vinna sinn riðill og Roma er í mjög góðri stöðu í öðru sæti. Rómverjum nægir stig í lokaumferðinni gegn Cluj eða þá að treysta á að Basel vinni ekki Bayern á útivelli á sama tíma.

Lokaumferðin:

Bayern München - Basel

Cluj - Roma

F-riðill:

Chelsea er með fullt hús stiga og búið að tryggja sér sigurinn í riðlinum. Marseille er öruggt með annað sætið. Spartak Moskva er meira að segja búið að tryggja sér þriðja sætið og þar með sæti í 32-liða úrslitum Evrópudeildar UEFA. Lokaumferðin er því þýðingarlaus.

Lokaumferðinn:

Marseille - Chelsea

Zilina - Spartak Moskva

G-riðill:

Real Madrid er öruggt með sigurinn í riðlinum og AC Milan annað sætið.

Lokaumferðin:

Real Madrid - Auxerre

AC Milan - Ajax

H-riðill:

Langmesta spennan er í H-riðli þar sem þrjú lið eiga enn möguleika á að koma sér áfram í 16-liða úrslitin. Shakhtar Donetsk er með tólf stig á toppnum en Arsenal og Braga með níu stig hvort.

Shakhtar er þó ekki öruggt áfram en í mjög góðri stöðu. Liðið má tapa fyrir Braga með þriggja marka mun eða þá treysta á að Arsenal vinni ekki Partizan Belgrad.

Arsenal dugir sigur gegn Partizan en Braga þarf að vinna Shakther með fjögurra marka mun til að vera öruggt áfram óháð úrslitum í leik Arsenal.

Lokaumferðin:

Arsenal - Partizan Belgrad

Shakhtar Donetsk - Braga