Andy Carroll: Ég og Rooney værum flottir saman

Hinn ungi en grjótharði sóknarmaður Newcastle, Andy Carroll, hefur heldur betur slegið í gegn á tímabilinu. Hann hefur verið iðinn við kolann og skoraði meðal annars gegn Chelsea í gær.

Fyrr í þessum mánuði lék Carroll sinn fyrsta A-landsleik og er talið að framtíðar-framherjapar Englands verði skipað honum og Wayne Rooney.

„Það voru einhverjir sem efuðust um að ég væri tilbúinn í landsliðið en sú hugsun hefur aldrei læðst að mér. Að nú sé talað um að ég og Wayne verðum saman frammi gefur mér mikið, hann er frábær leikmaður," segir Carroll.

„Ég er klár á því að við getum myndað frábært sóknarpar. Við erum ólíkir leikmenn en ættum að geta náð vel saman."