Ancelotti: Þurfum að gera betur fyrir framan markið

Carlo Ancelotti, stjóri Chelsea, segir að liðið þurfi að fara að skora meira á útivöllum ef það ætli sér að verja Englandsmeistaratitil sinn. Þeir bláklæddu hafa aðeins skorað eitt útivallamark í síðustu þremur deildarleikjum.

„Við vorum óheppnir en við þurfum að gera betur fyrir framan markið. Eitt mark í þremur útileikjum er ekki góð tölfræði og við verðum að bæta þetta," sagði áhyggjufullur Ancelotti eftir að Chelsea gerði 1-1 jafntefli við Newcastle í dag.

Chelsea lenti snemma undir á St James' Park í dag eftir herfileg varnarmistök. „Þetta voru dýrkeypt mistök sem gerðu það að verkum að leikurinn varð erfiðari en hann átti að verða. En á heildina litið lékum við vel í þessum leik," sagði Ancelotti.

„Það er auðvitað ekki gott að tapa toppsætinu og við verðum að setja í næsta gír. Frammistaða okkar um þessar mundir er ekki að nægja. Við byrjuðum leikinn illa en leikmenn brugðust vel við því að fá á sig mark."

Óróinn innan þjálfarateymis Chelsea að undanförnu hefur ekki haft slæm áhrif á liðið að mati Ancelotti. „Eins og ég sagði þá lék liðið vel. Við þurfum bara að sýna meiri nákvæmni í skottilraunum okkar. Að mínu mati áttum við að fá vítaspyrnu í fyrri hálfleik en ég kann illa við að gagnrýna dómara í viðtölum," sagði Ancelotti.