Kristján Gauti skoraði í 6-0 sigri Liverpool á Bolton

Kristján Gauti Emilsson var meðal markaskorara 18 liðs Liverpool þegar liðið vann 6-0 sigur á jafnöldrum sínum í Bolton um helgina.

Kristján Gauti lék allan leikinn og innsiglaði sigurinn með sjötta markinu í lokin. Áður höfðu þeir Brad Smith, Toni Silva (2), Michael Ngoo og Adam Morgan komið Liverpool í 5-0.

Liverpool hafði tapað tveimur leikjum í röð á móti Blackburn og West Brom þannig að sigurinn var langþráður fyrir Kristján Gauta og félaga.

„Við komum sterkir til baka eftir tvo slaka leiki og þetta var frábær liðsframmistaða," sagði Rodolfo Borrell, þjálfari 18 ára liðs Liverpool við heiamsíðu félagsins.