Ný félagasamtök eru ekki til höfuðs KSÍ

Knattspyrnufélög á Íslandi afla of lágra tekna til að standa undir rekstri. Samtök sem vinna að aukinni tekjumyndun taka til starfa á næstu dögum.

Fréttatíminn greindi frá því fyrir helgi að í burðarliðnum sé stofnun samtaka sem eiga meðal annars að beita sér í baráttu við KSÍ um aukið fjármagn.

Í öllum norðurlöndunum eru starfrækt samtök eða fyrirtæki í kringum úrvalsdeildirnar sem gefa félögunum meiri tekjur.

Í Noregi standa slík samtök fyrir deildarkeppninni í náinni samvinnu við knattspyrnusambandið.

Formenn knattspyrnudeilda félaga í Pepsídeild karla hafa undanfarið lagt grunninn að stofnun slíkra samtaka hér á landi sem myndu vinna í samræmi við þær aðstæður sem hér eru.

Undirbúningurinn er á lokastigi og er vonast til að samtökin geti hafið formlega starfsemi í janúar.

Hingað til lands hefur komið framkvæmdastjóri félagasamtakanna í Noregi og er það skoðun hans að tilvist þeirra hafi komið bæði félögunum og norska knattspyrnusambandinu til góða.

Jón Rúnar Halldórsson, formaður félags knattspyrnufélaga í Pepsídeildinni, segir samtökin ekki sett á laggirnar til höfuðs KSÍ heldur til að auka nálægð félaganna við sambandið. Hann segir félög í öllum deildum njóta góðs af samtökunum, ekki bara í Pepsídeildinni.

Jón Rúnar segir rekstur knattspyrnufélaga hér á landi mjög þungan og bendir á að KSÍ geti hagað tekjuskiptingu milli þeirra á annan hátt.

Það væri til dæmis eðlilegt ef félögin yrðu með í ráðum við gerð styrktarsamninga KSÍ og sölu á sjónvarpsrétti fyrir Pepsídeildina sem hingað til hefur eingöngu hefur verið í höndum KSÍ.