Umfjöllun: Haukarnir stálu stigi í Vesturbænum

Haukar fóru í Vesturbæinn og nældu sér í gott stig í kvöld er liðið gerði, 2-2, jafntefli við KR í fyrstu umferð Pepsi-deildar karla í fótbolta. KR-ingar virtust hafa leikinn í hendi sér en gestirnir vöknuðu undir lokin og stálu stigi.

KR-ingar byrjuðu sumarið með látum en þeir fengu strax gott marktækifæri á fyrstu mínútu leiksins. Guðjón Baldvinsson fékk sendingu inn fyrir en Daði Lárusson var vel vakandi í markinu og sá við honum.

Afmælisbarnið og markakóngur síðasta sumars Björgólfur Takefusa sem fagnaði þrítugsafmæli sínu í kvöld opnaði markareikninginn eftir korters leik en hann skoraði af stuttu færi eftir sendingu frá Gunnari Erni af vængnum.

Félagi hans í framlínunni, Guðjón Baldvinsson bætti svo við öðru markinu eftir hálftíma en hann skallaði boltann laglega í markið eftir góða hornspyrnu frá Bjarna Guðjónssyni.

Gestirnir í Haukum áttu fá svör við sprækum KR-ingum en þeir áttu aðeins eitt skot á markið í fyrrihálfleik. Allt lið Hauka sat mjög aftarlega á vellinum eins og við var að búast en þeir skora ekki á meðan þeir skjóta ekki á markið.

Staðan í hálfleik 2-0 KR-ingum í vil og áhorfendur í Frostaskjólinu biðu spenntir eftir fleiri mörkum.

Haukar vöknuðu í seinni hálfleik og fóru að spila boltanum á milli sín. Þeir virtust hafa losað sig við hræðsluna og fóru að hafa trú á verkefninu.

Það skilaði sér að lokum því varamaðurinn Úlfar Hrafn Pálsson minnkaði muninn fyrir gestina þegar tíu mínútur voru eftir. Arnar Gunnlaugsson átti þá sprett upp vænginn og eftir klafs í teignum datt boltinn fyrir lappirnar á Úlfari sem átti ekki í neinum vandræðum með að klára færið. Staðan 2-1 og leikurinn galopnaðist.

Jöfnunarmarkið kom svo í kjölfarið. Pétur Ásbjörn Sæmundsson jafnaði leikinn þegar að tvær mínútur voru eftir við mikinn fögnuð Haukamanna. Pétur skoraði með fallegu skallamarki og tryggði þar með gríðarlega mikilvægt stig sem þeir félagar fara brosandi með heim í Hafnarfjörðinn.

KR-ingar fengu mörg tækifæri til að klára leikinn en inn vildi boltinn ekki eftir fyrstu tvö mörkin. Björgólfur átti gott skot sem endaði í þverslánni og að sama skapi Óskar Örn sem átti hörkuskot í slá.

Eftir flottan fyrrihálfleik misstu þó heimamenn leikinn til gestanna sem tryggðu sér mikilvægt stig sem fáir áttu von á en þeir geta vel við unað og börðust eins og ljón í seinni hálfleiknum. Það skilaði þessu stigi í kvöld.

KR - Haukar 2-2

Björgólfur Takefusa (16.)

Guðjón Baldvinsson (31.)

Úlfar Hrafn Pálsson (78.)

Pétur Ásbjörn Sæmundsson (88.)

Áhorfendur: 2112.


Dómari: Þóroddur Hjaltalín (7)

Skot (á mark): 23-7 (14-6)


Varin skot: Lars Ivar 3 - Daði 8


Horn: 15-0


Aukaspyrnur fengnar: 14-10


Rangstöður: 4-1

KR (4-2-2):

Lars Ivar Moldsked 4

Skúli Jón Friðgeirsson 5

Baldur Sigurðsson 6

Mark Rutgers 5

Jordao Diogo 5

Bjarni Eggert Guðjónsson (F) 7

Viktor Bjarki Arnarsson 5

Óskar Örn Hauksson 7

(73. Guðmundur Reynir Gunnarsson 5)

Gunnar Örn Jónsson 7 - Maður leiksins

(84. Gunnar Kristjánsson -)

Guðjón Baldvinsson 6

(65. Kjartan Henry Finnbogason 5)

Björgólfur Takefusa 6

Haukar (4-5-1):

Daði Lárusson 5

Kristján Ómar Björnsson 5

Þórhallur Dan Jóhannsson (F) 5

(23. Gunnar Ásgeirsson ) 5

Guðmundur Viðar Mete 5

Guðjón Lýður Pétursson 6

Hilmar Trausti Arnarsson 5

Hilmar Geir Eiðsson 5

(65. Hilmar Rafn Emilsson 5)

Pétur Ásbjörn Sæmundsson 7

Sam Mantom 6

Kristján Óli Sigurðsson 4

(70. Úlfar Hrafn Pálsson 6)

Arnar Bergmann Gunnlaugsson 5