Jafnt hjá Newcastle og Chelsea - Man Utd heldur toppsætinu

Newcastle og Chelsea gerðu 1-1 jafntefli í mjög fjörugum leik sem var að ljúka. Manchester United fer því inn í vikuna á toppnum, liðið er með tveggja stiga forystu á Chelsea og Arsenal.

Kevin Nolan gat ekki leikið með Newcastle vegna ökklameiðsla. Miðverðirnir Mike Williamson og Fabricio Coloccini tóku báðir út leikbann og því voru Sol Campbell og Steven Taylor í hjarta varnarinnar.

Carlo Ancelotti, stjóri Chelsea, gerði aðeins eina breytingu á liðinu sem tapaði fyrir Birmingham. Jose Bosingwa kom í stað Paulo Ferreira.

Newcastle byrjaði leikinn mun betur og komst yfir eftir aðeins sex mínútna leik en þá skoraði hinn sjóðheiti harðjaxl Andy Carroll. Hann nýtti sér fáránleg mistök hjá Alex, varnarmanni Chelsea, og skoraði í tómt markið. Alex gaf misheppnaða sendingu til baka ætlaða Petr Cech og komst Carroll í hana.

Á lokamínútu fyrri hálfleiks jafnaði Chelsea. Florent Malouda kom boltanum á Salomon Kalou sem lék á Campbell áður en hann skaut að marki. Boltinn breytti lítillega um stefnu af varnarmanni áður en hann hafnaði í netinu.

Þrátt fyrir að engin mörk hafi verið skoruð í seinni hálfleiknum var hann opinn og skemmtilegur. Chelsea bjargaði á línu og þá fékk Kalou dauðafæri til að tryggja þeim bláu stigin þrjú en brást bogalistin.

Newcastle situr í níunda sæti deildarinnar með 19 stig eftir þennan leik.