QPR vann toppslaginn

QPR styrkti stöðu sína á toppi ensku B-deildarinnar með 2-1 sigri á Cardiff í toppslag ensku B-deildarinnar í dag.

Heiðar Helguson var á bekknum hjá QPR í dag og kom ekki við sögu. Adal Taarbt skoraði sitt níunda mark á tímabilinu í dag og tryggði sínum mönnum sigurinn í síðari hálfleik.

Craig Bellamy kom Cardiff yfir á 13. mínútu leiksins en fimm mínútum síðar jafnaði Kaspars Gorkss metin fyrir QPR.

QPR er nú með 41 stig á toppi deildarinnar, fimm stigum á undan Cardiff sem er enn í öðru sæti.

Coventry kom sér upp í fimmta sæti deildarinnar með 2-0 sigri á Scunthorpe á útivelli. Aron Einar Gunnarsson var í byrjunarliði Coventry en var tekinn af velli í blálokin.

Jóhannes Karl Guðjónsson kom ekki við sögu í 6-0 sigri Huddersfield á Macclesfield í ensku bikarkeppninni.