Obama dáist að hugrekki kjósenda í Írak

Forseti Bandaríkjanna, Barack Obama segist dást að hugrekki þeirra Íraka sem hafa farið á kjörstaði í dag en ekki látið undan ofbeldisöldunni sem nú ríður yfir landið og hótunum hryðjuverkamanna um ódæði. Þegar hafa 35 látist í skotbardögum og hryðjuverki sem grandaði 25 Írökum.

Ofbeldið er gríðarlegt í landinu en hálf milljón hermanna gæta kjósenda og reyna að tryggja öryggi þeirra. Þá hefur bílaumferð verið bönnuð og landamærum að Íran lokað.

Hryðjuverkasamtökin al-Qaeda hótuðu hryðjuverkárásum í aðdraganda kosninganna í Írak. Uppreisnarsamtök súnníta sem kalla sig Írak - ríki múslima og innihalda meðlimi al-Qaeda, lýstu yfir útgöngubanni á kjördag og vöruðu alla þá sem hygðust fara út til að kjósa að þeir yrðu berskjaldaðir gagnvart reiði Allah og öllum vopnum uppreisnarhersins, að því er fram kemur í bandaríska dagblaðinu The Washington Post.

Forsætisráðherra Íraks, Nouri-al Maliki, hvatti kjósendur hins vegar til að nýta sér atkvæðisréttinn. Búist var við að kjörsókn yrði mikil þrátt fyrir hryðjuverkahættu og hótanir um að óbreyttir borgarar yrðu beittir ofbeldi.

Þetta er í annað sinn sem kosið er til þings í Írak frá innrásinni árið 2003 og eftir að Saddam Hussein var hrakinn frá völdum. Um 6200 frambjóðendur frá 86 stjórnmálaflokkum og berjast um 325 þingsæti.