Ferguson: Van der Sar hættir líklega í vor

Alex Ferguson, stjóri Manchester United, á von á því að Edwin van der Sar muni leggja hanskana á hilluna þegar að tímabilinu lýkur í ensku úrvalsdeildinni.

Van der Sar varð fertugur í lok síðasta mánaðar en er enn afar mikilvægur leikmaður í liði United.

Hann hefur sjálfur ekki gefið út hvað hann ætlar að gera í lok tímabilsins en Ferguson telur að Van der Sar vilji ekki halda áfram að spila nema að hann geti haldið sér í góðu formi. Þá segir hann einnig að Van der Sar vilji eyða meiri tíma með eiginkonu sinni sem veiktist illa á síðasta ári.

"Ég hef sætt mig við það að þetta verði síðasta tímabil Edwin," sagði Ferguson í samtali við enska fjölmiðla.

"Það gerðist hjá Shilton á sínum tíma að formið hans hrundi skyndilega og ég held að Edwin vilji ekki að það sama komi fyrir hann. Hann er afar stoltur maður og það verður sárt að missa hann."

"Við ræddum saman á síðasta tímabili um framtíðina hans og það hefur ekki mikið breyst síðan þá."