Fjölmiðlar: Rooney launahæsti leikmaðurinn í sögu United

Enskir fjölmiðlar eru nú að keppast við að segja fréttir af Wayne Rooney og nýja samningi hans við Manchester United.

Rooney skrifaði í morgun undir nýjan fimm ára samning við félagið sem kom öllum knattspyrnuheiminum í opna skjöldu.

Fyrr í vikunni höfðu bæði Rooney og Sir Alex Ferguson, stjóri United, staðfest að Rooney vildi fara. Ferguson sagði þá að félagið hafi verið reiðubúið að gera hann að launahæsta leikmanni Englands.

Rooney var samkvæmt gamla samningnum með 90 þúsund pund í vikulaun, miðað við það sem fram hefur komið í fjölmiðlum.

Samningurinn sem hann hafnaði var með grunnlaun upp á 110 þúsund pund auk myndarlegra aukagreiðslna sem hefðu híft meðaltalsvikulaun hans upp í 150 þúsund pund.

Það er meira en Cristiano Ronaldo fékk á sínum tíma og Rio Ferdinand er með í dag.

En nú er verið að greina frá því að sá samningur sem Rooney skrifaði undir í morgun sé meira virði og að hann hafi nánast tvöfaldast í launum. Hann sé nú að fá allt að 180 þúsund punda í vikulaun.

Ef það er rétt er hann langlaunahæsti leikmaður í sögu félagsins.

Fréttir í vikunni hafa gefið í skyn að Rooney og umboðsmaður hans hafi farið fram á það við önnur félög að hann fengi 250 þúsund pund í vasann í hverri viku - eftir skatt. Hann var þá helst orðaður við Manchester City, Chelsea og Real Madrid.

Auk þessa alls þénar Rooney mikið á samningi sínum við styrktaraðila og hvergi meira en hjá íþróttavöruframleiðandanum Nike.

„Rooney hefur alltaf verið meiri Nike-maður en Everton- eða United-maður," sagði heimildamaður Goal.com.