Redknapp vill frekar verða Englandsmeistari en Evrópumeistari

Harry Redknapp, stjóri Tottenham, segist vilja frekar gera Tottenham að Englandsmeisturum í vor en að vinna Meistaradeildina fyrstir Lundúnaliða. Tottenham tryggði sér sæti í 16 liða úrslitum Meistaradeildarinnar í vikunni og framundan er leikur á móti Liverpool um helgina.

„Þetta er mjög sérstök vika fyrir mína menn í Tottenham. Hún byrjaði á því að koma til baka og vinna Arsenal á þeirra heimavelli og því var síðan fylgt á eftir með því að tryggja sig inn í sextán liða úrslit Meistaradeildarinnar," sagði Harry Redknapp.

„Þetta gengur allt eins og í sögu þessa dagana en það er engin trygging fyrir því að við vinnum eeitthvað í vor. Ef að ég þyrfti að velja á milli þess að verða Englandsmeistari eða Evrópumeistari þá vildi ég frekar vinna ensku deildina þótt að ég sætti mig alveg við hvorn titilinn sem er," sagði Redknapp.