Umfjöllun: Stjörnumenn fóru létt með lánlausa Grindvíkinga

Áhorfendur voru varla búnir að fá sér sæti á Stjörnuvelli í kvöld þegar vendipunkturinn í leik Stjörnunnar og Grindavík átti sér stað. Auðunn Helgason gerði sig þá sekan um skelfileg varnarmistök þegar hann braut á Steinþóri Frey Þorsteinssyni innan vítateigs, eftir tæplega tveggja mínúta leik.

Jóhannes Valgeirsson dæmdi réttilega vítaspyrnu og lét Auðunn fjúka útaf með rauða spjaldið, enda var hann aftasti varnarmaður Grindavíkur. Halldór Orri Björnsson skoraði úr vítaspyrnunni sem átti eftir að verða fyrsta markið af fjórum hjá Stjörnumönnum.

Þetta atvik virtist slá Suðurnesjamennina algjörlega út af laginu sem náðu engum takti við leikinn og Stjörnumenn sóttu af miklum krafti. Þeir bláklæddu hreinlega óðu í góðum færum og hefðu auðveldlega getað verið þremur mörkum yfir þegar flautað var til hálfleiks.

Grindvíkingar komu ákveðnari til leiks í síðari hálfleik og hefðu jafnvel með örlítilli heppni getað jafnað leikinn. Gilles Mbang Ondo slapp t.a.m. einn í gegnum vörn Stjörnunnar á 63. mínútu en rangstöðu var flaggað, þó naumt hafi það verið. Það var kannski til marks um lánleysi Grindvíkinga í þessum leik að í næstu sókn bætti Stjarnan við öðru marki og var þar Halldór Orri aftur að verki með skemmtilegum snúningsbolta framhjá Óskari Péturssyni í marki Grindavíkur.

Við markið efldust Stjörnumenn sem náðu fullum tökum á leiknum. Þriðja mark kvöldsins leit dagsins ljós á 77. mínútu, og enn á ný eftir dapra varnartilburði hjá Grindvíkingum. Mattías Örn Friðriksson ætlaði að skalla boltann tilbaka í hendurnar á Óskari í marki Grindvíkinga en Steinþór Freyr komst inn í sendinguna og afgreidd boltann skemmtilega yfir Óskar.

Það kom fáum á óvart þegar Jóhann Laxdal bætti svo við fjórða markinu á 84. mínútu eftir frábæra stungusendingu frá Steinþóri Frey sem átti stórgóðan leik. Jóhann stakk sér á milli varnarmanna Grindavíkur á háréttum tíma og setti boltann örugglega í netið.

Til að bæta gráu ofan á svart fékk Gilles Mbang Ondo svo að líta sitt annað gula spjald undir lok leiks eftir viðskipti sín við Baldvin Sturluson í liði Stjörnunnar. Ondo verður því í banni í næsta leik Grindvíkinga, sem þurfa verulega að hysja upp um sig brækurnar eftir kennslustund á teppinu í Garðabænum.

Það verður ekki tekið að Stjörnumönnum að þeir léku glimrandi skemmtilegan fótbolta í kvöld og hefðu í raun átt að vinna leikinn mun stærra. Steinþór og Halldór léku vel í kvöld og ljóst er að nærvera Marels Baldvinssonar á eftir að hjálpa liðinu mikið. Nái Stjörnumenn að sleppa frá meiðslum í sumar, gætu þeir hæglega endað mun ofar en sparkspekingar hafa spáð þeim.

Stjarnan-Grindavík 4-0

1-0 Halldór Orri Björnsson (3. vsp.)

2-0 Halldór Orri Björnsson (64.)

3-0 Steinþór Freyr Þorsteinsson (77.)

4-0 Jóhann Laxdal (84.)

Áhorfendur: 780

Dómari: Valgeir Valgeirsson 7

Skot (á mark): 13-3 (6-0)

Varin skot: Bjarni 0 - Óskar 4

Horn: 5-4

Aukaspyrnur fengnar: 12-13

Rangstöður: 0-5

Stjarnan (4-5-1):

Bjarni Þórður Halldórsson 6

Tryggvi Sveinn Bjarnason 6

Jóhann Laxdal 7

Atli Jóhannsson 7

Daníel Laxdal 7

Halldór Orri Björnsson 8

Dennis Danry 6

Steinþór Freyr Þorsteinsson 8 - Maður leiksins

Baldvin Sturluson 6

(71. Bjarki Páll Eysteinsson 6)

Hafsteinn Rúnar Helgason 6

Marel Jóhann Baldvinsson 7

(75. Þorvaldur Árnason -)

Grindavík (4-5-1):

Óskar Pétursson 4

Ray Anthony Jónsson 5

Auðun Helgason -

Marko Valdimar Stefánsson 6

Jóhann Helgason 6

Matthías Örn Friðriksson 4

Scott Mckenna Ramsay 6

(78. Óli Baldur Bjarnason -)

Orri Freyr Hjaltalín 6

Gilles Mbang Ondo 5

Jósef Kristinn Jósefsson 6

(78. Sveinbjörn Jónasson -)

Alexander Magnússon 5

(46., Loic Mbang Ondo 6)