Rústabjörgunarsveitin í Boston

13. janúar 2010 17:01

Rústabjörgunarsveitin flaug til Boston í Bandaríkjunum til að taka eldsneyti. Mynd/Valgarður Gíslason

Flugvél með íslenska alþjóðabjörgunarsveitina sem er á leið til Haítí millilenti í Bandaríkjunum á fimmta tímanum í dag til að taka eldsneyti. Áætlanir gera ráð fyrir að hún fari í loftið á nýjan leik skömmu eftir klukkan fimm.

Björgunarsveitin sem er sérhæfð í rústabjörgun er á leið til Haítí vegna jarðskjálftanna í gærkvöldi. Þá reið yfir skjálfti að stærðinni 7,1 en upptök hans voru skammt frá höfuðborginni Port au Prince. Óttast er að þúsundir manna hafi farist í jarðskjálftanum.

Fljótlega eftir að fréttir bárust af skjálftanum og þeim skaða er hann olli bauð utanríkisráðuneytið fram aðstoð rústabjörgunarsveitarinnar og unnu fulltrúar ráðuneytisins, ráðherra og Slysavarnafélagið Landsbjörg í nótt að undirbúningi. Að því loknu var farið á Keflavíkurflugvöll þar sem búnaður sveitarinnar er geymdur en hann vegur um 13 tonn, þar af eru um þrjú tonn af vatni. Gert er ráð fyrir að sveitin geti starfað án utanaðkomandi aðstoðar í 10 daga.

Það var svo klukkan 11 fyrir hádegi sem flugvél Icelandair fór í loftið frá Keflavíkurflugvelli með 35 meðlimi sveitarinnar og fulltrúa frá utanríkisráðuneytinu sem mun fylgja sveitinni til Haítí. Búist er við því að flugvélin lenti á Haítí í kringum áttaleytið í kvöld að íslenskum tíma.

Tengdar fréttir

Rústabjörgunarsveitin farin af stað

Íslenska alþjóðabjörgunarsveitin sem er sérhæfð í rústabjörgun er lögð af stað til Haití til björgunarstarfa. Flugvél frá Icelandair fór í loftið frá Keflavíkurflugvelli um klukkan 11 með 35 meðlimi sveitarinnar og fulltrúa frá utanríkisráðuneytinu sem mun fylgja sveitinni til Haití.

13. janúar 2010 11:12

Rústabjörgunarsveitin á leið í loftið

„Við erum í lokahnykknum. Allur farangur er kominn um borð og nú bíðum við eftir að fá leyfi til að fara í loftið," segir Kristinn Ólafsson, framkvæmdastjóri Slysavarnarfélagsins Landsbjargar. 36 manna björgunarsveit er á leið skjálftasvæðið í Haítí. Auk þess fara Kristinn og starfsmaður utanríkisráðuneytisins með hópnum en þeir koma væntanlega til baka á morgun.

13. janúar 2010 09:57

Túlkur íslensku sveitarinnar missti húsið

Haítíbúinn sem kemur til með að aðstoða og túlka fyrir íslensku rústabjörgunarsveitina sem er á leið til Haítí missti húsið sitt í jarðskjálftanum í gærkvöldi. Hann komst ásamt eiginkonu sinni og mánaðargömlu barni út úr húsinu en missti flestar aðrar eigur sínar. Þetta hefur Pétur Guðjónsson eftir honum en Pétur hefur dvalið langdvölum í landinu undanfarin 15 ár við hjálpar- og uppbyggingarstarf. Hann hefur í morgun ítrekað reynt að ná sambandi við íbúa sem hann þekkir á eyjunni og er túlkurinn sá eini sem Pétur hefur náð í.

13. janúar 2010 13:45

Rauði krossinn með símasöfnun vegna hamfaranna í Haítí

„Reynslan sýnir að fyrstu aðgerðir Rauða krossins í jarðskjálftum sem þessum eru að veita fólki skjól, mat og hreint vatn, auk læknisaðstoðar og sálræns stuðnings,” segir Kristján Sturluson, framkvæmdastjóri Rauða kross Íslands, sem hefur opnað söfnunarsíma sinn vegna jarðskjálftans á Haítí í gærkvöldi. Rauði krossinn hér á landi hefur boðið fram vana sendifulltrúa í neyðarviðbrögðum.

13. janúar 2010 11:55

Mest lesið

Fleiri fréttir