Rústabjörgunarsveitin farin af stað

Íslenska alþjóðabjörgunarsveitin sem er sérhæfð í rústabjörgun er lögð af stað til Haití til björgunarstarfa. Flugvél frá Icelandair fór í loftið frá Keflavíkurflugvelli um klukkan 11 með 35 meðlimi sveitarinnar og fulltrúa frá utanríkisráðuneytinu sem mun fylgja sveitinni til Haití.

„Er búist við að íslenska sveitin verði meðal fyrstu alþjóðlegra björgunarsveita á staðinn en það má þakka snörum viðbrögðum utanríkisráðuneytisins," segir í tilkynningu frá Slysavarnarfélaginu Landsbjörgu.

„Hópurinn hefur verið þjálfa og undirbúa sig fyrir verkefni eins og þetta. Það verður að koma síðar í ljós hvað bíður okkar en það er ljóst að þarna hafa átt sér stað miklar hamfarir þannig að það er líka óvissa sem bíður okkar," sagði Kristinn Ólafsson, framkvæmdastjóri Slysavarnarfélagsins Landsbjargar, í samtali við fréttastofu fyrr í morgun.

Flogið verður til Boston í Bandaríkjunum og þaðan er stefnan tekin á Haiti. Á þessari stundu er þó óljóst hvort hægt verður að lenda á Haití og verið getur að lenda þurfi í Dómínínska lýðveldinu og ferðast þaðan landleiðina til Haití, að fram kemur í tilkynningunni.

Fljótlega eftir að fréttir bárust af skjálftanum og þeim skaða er hann olli bauð utanríkisráðuneyti Íslands fram aðstoð sveitarinnar og unnu fulltrúar ráðuneytisins, ráðherra og Slysavarnafélagið Landsbjörg í alla nótt að undirbúningi.

Að því loknu var farið á Keflavíkurflugvöll þar sem búnaður sveitarinnar er geymdur en hann vegur um 13 tonn, þar af eru um þrjú tonn af vatni. Gert er ráð fyrir að sveitin geti starfað án utanaðkomandi aðstoðar í 10 daga.

Í tilkynningunni segir að íslenska rústabjörgunarsveitin sé í afar góðri æfingu. Hún undirgekkst úttekt á vegum INSARAG, sem eru samtök rústabjörgunarsveita er starfa undir hatti Sameinuðu þjóðanna, síðastliðið haust og hlaut þar afar góða umsögn. Íslenska sveitin er ein af fáum alþjóðarústabjörgunarsveitum sem fengið hafa slíka vottun.