Fletcher ekki með United á morgun

Darren Fletcher er enn meiddur á ökkla og getur því ekki spilað með Manchester United gegn Blackburn í ensku úrvalsdeildinni á morgun.

Fletcher missti einnig af leiknum gegn Rangers í Meistaradeildinni í vikunni en vonir voru bundnar við að hann gæti náð leiknum gegn Blackburn.

Þá er Paul Scholes tæpur fyrir helgina og gæti það þýtt að Brasilíumaðurinn Anderson fái tækifæri í byrjunarliðinu.

Varnarmennirnir Rio Ferdinand og Nemanja Vidic eru þó báðir klárir í slaginn eftir að þeir fengu hvíld nú í vikunni.