Guðjón: Örugglega flottasta mark sem ég hef skorað

"Þetta var meistaraframmistaða," sagði Guðjón Baldvinsson, kampakátur og snyrtilegur eftir frábæran leik sinn og KR í kvöld. Hann skoraði tvö í 1-4 sigri á Fylki.

Fyrra markið hans var draumamark, með glæsilegri hjólhestaspyrnu.

"Þetta er örugglega flottasta mark sem ég hef skorað á ferlinum. Ég þarf að skoða þetta aftur," sagði Guðjón en Ólafur Þórðarson kallaði það "grísamark."

"Hann skoraði heldur aldei svona mörk, hann var bara í tæklingunum," sagði Guðjón léttur.

Hann tekur undir það að titillinn er KR að tapa. "Ef við vinnum okkar leiki verðum við meistarar. Þá eigum við það líka skilið. Ef það tekst ekki þá eigum við það ekki skilið," sagði sóknarmaðurinn knái.

Hann segir að liðið hafi verið betra í allt kvöld, utan fyrstu fimm mínútnanna. "Já við vildum bara gefa áhorfendum meira fyrir peninginn með því að fá á okkur mark. Þetta rífur folk örugglega á völlinn næst," sagði Guðjón léttur og greinilega í stuði.

"Við höfum sjálfstraust og þolinmæði til að klára leiki. Við bognum kannski aðeins en brotnum aldrei. Sjálfstraustið skín í gegn," sagði Guðjón.