Zola í viðræðum við Eið Smára

Gianfranco Zole hefur greint frá því að hann eigi nú í viðræðum við Eið Smára Guðjohnsen um að fá hann til liðs við West Ham.

Zola hefur áður sagt að hann vilji fá minnst einn framherja áður en félagaskiptaglugginn lokar um næstu mánaðamót en hefur hingað til ekki nefnt nein nöfn til sögunnar.

Hann hefur nú viðurkennt að hann eigi í viðræðum við Eið Smára en þeir léku lengi saman hjá Chelsea.

Zola sagði að það væri ekki auðvelt að lokka Eið Smára frá Barcelona þó svo að hann væri ekki fastamaður í byrjunarliðinu þar.

„Hann er að spila með Barcelona og í Meistaradeild Evrópu. Þó svo að hann spili ekki alltaf er hann samt með," sagði Zola. „Ég get vel skilið áhyggjur hans enda er West Ham augljóslega ekki jafn stórt félag og Barcelona."

„Við erum í góðu félagi þar sem framtíðin er björt en kannski kemur hann ekki auga á það. Við þurfum að bíða og sjá til."