Yfir 25.000 manns vakta Obama í dag

Yfir 25.000 manns koma að öryggisgæslu í Washington þegar Barack Obama sver embættiseið sinn í dag.

Fertugasti og fjórði forseti Bandaríkjanna sver embættiseið sinn á hádegi í dag að staðartíma og er búist við að um fjórar milljónir manna leggi leið sína til Washington til að fylgjast með atburðinum og ekki síður til að hlýða á ræðu forsetans nýja sem hann flytur af tröppum þinghússins Capitol Hill eftir að hafa svarið þjóðinni hollustu sína.

Gríðarleg öryggisgæsla er í borginni og er gert ráð fyrir því að 8.000 lögregluþjónar verði á vakt við embættistökuna. Að auki hafa 10.000 þjóðvarðliðar verið kvaddir til og 7.500 hermenn. Stór hluti miðborgar Washington verður algjörlega lokaður fyrir bílaumferð, umfangsmikið eftirlit fer fram úr lofti, varðskip sigla um árnar og flestum brúm í nágrenni miðborgarinnar verður lokað.

Þá verða sérstök efnavopnateymi á vakt víða um borgina, búin fullkomnasta tæknibúnaði til að mæla hvers kyns eiturefni í loftinu. Homeland Security segist þó ekki eiga von á neinum sérstökum ógnum og sennilega verði það einungis napur kuldinn í Washington sem herji á nýja forsetann og áhorfendur.