Jacqui Smith hlaut húsnæðisstyrk á vafasömum forsendum

Breski innanríkisráðherrann Jacqui Smith hefur viðurkennt að hafa skráð lögheimili sitt heima hjá systur sinni í London í þeim tilgangi að hljóta styrki úr ríkissjóði vegna reksturs annars heimilis utan London en hún býr með fjölskyldu sinni í Redditch.

Styrkinn notar Smith svo til að greiða systur sinni leigu. Samtök skattgreiðenda í Bretlandi hafa látið til sín heyra vegna málsins og segja greiðslur til innanríkisráðherrans á þessum forsendum siðferðilega rangar. Smith heldur því fram að hún hafi leitað álits lögfræðinga breska þingsins fyrir mörgum árum og fengið þann úrskurð að hún bryti engar reglur með því að þiggja greiðslurnar.