Vilja hafa meiri áhrif á herliðin

Stjórnvöld í Afganistan vilja fá að ráða meiru um starfsemi herliðs Atlantshafsbandalagsins í landinu.

Afganistanstjórn hefur sent NATO drög að samkomulagi, sem felur í sér að hún þurfi að samþykkja starfsreglur, fjölda og staðsetningu NATO-hermanna í landinu.

Hamid Karzai, forseti Afganistans, ítrekaði í gær gagnrýni sína á Bandaríkin og önnur herveldi, sem hafa herlið í Afganistan, fyrir að hafa ekki hætt loftárásum á almenning í landinu, eins og hann hefur krafist. Hann ítrekaði jafnframt að sigur gæti aldrei unnist án stuðnings almennings. - gb