Obama leitar jafnvægis

Barack Obama Bandaríkjaforseti reynir nú að finna jafnvægi milli repúblikana á hægri kantinum, sem telja efnahagsráðstafanir hans leggja of miklar byrðar á ríkissjóð, og demókrata á vinstri kantinum, sem vilja ganga enn lengra í að nota skattfé til að bjarga efnahagslífi landsins.

Mikill þrýstingur er á Obama um að grípa sem allra fyrst til aðgerða til bjargar efnahagslífinu, en deilt er um hvaða leiðir eru réttar. Obama vill að þingið samþykki 825 milljarða dala björgunaraðgerðir til að hleypa nýju lífi í efnahag Bandaríkjanna. Joe Biden varaforseti og efnahagsráðgjafar Obamas tóku undir með honum og hvöttu þingið til þess að samþykkja aðgerðapakkann.

Á alþjóðavettvangi hafa sumir helstu óvinir Bandaríkjanna beðið með opnum huga frétta af því hvernig Obama ætli að taka á deilumálum þeirra. Fídel Kastró, fyrrverandi Kúbuleiðtogi, er sagður býsna ánægður með nýja forsetann í Bandaríkjunum, og bæði Norður-Kóreumenn og Íranar hafa tekið vel í nýjar hugmyndir til lausnar deilum um kjarnorkumál.

Ali Larijani, forseti Íransþings, sagðist þó í gær efast um að stefna Obama gagnvart Ísrael og Palestínumönnum verði frábrugðin stefnu George W. Bush, fráfarandi forseta.- gb