Áfram rætt um vopnahlé

Hundruð manna hlupu í ofboði út úr nokkrum stjórnarbyggingum á Gasa­svæðinu í gær þegar orðrómur komst á kreik um að Ísraelar ætluðu að gera nýja sprengjuárás.

Ekkert reyndist hæft í orðrómnum. Hamashreyfingin bað fólk um að sýna stillingu, vopnahléið væri enn í fullu gildi og samningafundir stæðu yfir í Egyptalandi.

Orðrómurinn virtist fara á kreik í framhaldi af orðum ísraelska ráðherrans Shauls Mofaz, sem minnti Palestínumenn á örlög Sheiks Ahmeds Yassins, andlegs leiðtoga og eins stofnenda Hamashreyfingarinnar, sem ísraelskir útsendarar drápu fyrir fimm árum.

„Ég vil segja leiðtogum Hamas, og misskiljið mig nú ekki," sagði Mofaz: „Enginn ykkar getur um frjálst höfuð strokið á götum Gasa fyrr en Schalit fær frelsið," en Schalit er ísraelski hermaðurinn Gilad Schalit, sem hefur verið gísl herskárra Palestínumanna á Gasasvæðinu síðan 2006.

Æðstu leiðtogar Hamas á Gasasvæðinu hafa ekki sést opinberlega eftir hinar heiftarlegu árásir Ísraels­hers sem lauk fyrir rúmri viku. Millistjórnendur hreyfingarinnar mættu hins vegar til vinnu sinnar í gær, sumir í rústum skrifstofubygginga samtakanna í Gasaborg.

Sendinefnd frá Hamas fór til viðræðna við egypska embættismenn í gær til að semja um að landamærin verði opnuð, en þau hafa verið lokuð að mestu síðan Hamas tók sér völd á Gasaströnd í júní 2007.

Einnig standa yfir viðræður milli Ísraela, Bandaríkjamanna og Egypta um það hvernig koma megi í veg fyrir vopnasmygl Hamas inn á Gasasvæðið.

George Mitchell, nýskipaður sendifulltrúi Baracks Obama Bandaríkjaforseta í Mið-Austurlöndum, er væntanlegur til Ísraels á miðvikudag og mun ræða bæði við Ísraela og Palestínumenn á Vesturbakkanum.

Hamashreyfingin hóf í gær að deila út peningaaðstoð til þeirra íbúa á Gasasvæðinu sem urðu fyrir tjóni af völdum árása Ísraela. Peningarnir koma fyrst í stað úr sjóðum hreyfingarinnar, sem nýtur fjárhagsstuðnings frá Íransstjórn og velunnurum víða um heim.

gudsteinn@frettabladid.is