Schmeichel vill fara frá City

Kasper Schmeichel vill fara frá Manchester City og finna sér nýtt félag nú í janúarmánuði, eftir því sem umboðsmaður hans sagði.

Schmeichel hefur lítið fengið að spila hjá City og hefur verið varaskeifa fyrir Joe Hart. Talið er að City myndi taka tilboði upp á eina milljón punda fyrir Schmeichel.

„Verðmiðinn gæti verið svolítið hár en á hinn bóginn hefur hann sýnt að hann getur staðið sig á meðal þeirra bestu," sagði umboðsmaðurinn Michael Johansen í samtali við Ekstra Bladet. „Okkar vinna miðast við að hann fari annað nú strax í þessum mánuði."