Hamfarir í Asíuríkjum kosta hundruð manna lífið

Gríðarleg eyðilegging varð í þorpum og bæjum á Samóaeyjum í Suður-Kyrrahafi þegar mikil flóðbylgja reið þar yfir í gær. Á annað hundrað manns fórst og tuga manns að auki er saknað.

Íbúarnir flúðu frá láglendi og upp í hæðir á eyjunum. Þar hélt fólk sig klukkustundum saman þangað til ljóst var að flóðið væri í rénun.

Flóðbylgjan var framkölluð af jarðskjálfta, sem mældist 8,3 stig. Upptök skjálftans voru í um 200 kílómetra fjarlægð frá Samóaeyjum, þar sem 180 þúsund manns búa, og í um 190 kílómetra fjarlægð frá nágrannaríkinu Bandarísku Samóa, þar sem um 65 þúsund manns búa.

Alls riðu fjórar flóðbylgjur yfir eyjarnar og var ölduhæð þeirra fjórir til sex metrar. Fjöldi þorpa á eyjunni Tonga varð einnig fyrir tjóni vegna flóðsins.

Skjálftinn varð snemma á þriðjudagsmorgun að staðartíma, en tæpum sólarhring síðar varð annar stór jarðskjálfti skammt frá Indónesíu sem kostað hefur tugi manna lífið, hugsanlega hundruð manna.

Skjálftinn olli verulegu tjóni á byggingum á Indónesíu. Einnig féll skriða skammt frá bænum Padang og var óttast að fjöldi fólks þar hafi grafist undir húsarústum. Verulegt tjón varð einnig í höfuðborginni Jakarta.

Óttast var að sá jarðskjálfti, sem mældist 7,6 stig, myndi einnig framkalla flóðbylgju, en viðvörun um það var síðar afturkölluð. Íbúar við strendur Indlandshafs flúðu margir hverjir úr húsum sínum, en sneru aftur þegar sú hætta var liðin hjá.

Nokkur þúsund kílómetrar eru á milli skjálftastaðanna og engar líkur á því að þeir tengist með neinum hætti.

Fleiri veðurhamfarir hafa riðið yfir íbúa í þessum heimshluta, því eitt öflugasta fárviðri sem geisað hefur í Suðaustur-Asíu hefur kostað hundruð manna lífið síðustu daga.

Fellibylurinn Ketsana feykti í gær um koll heilu þorpunum í Kambódíu og aurskriður af hans völdum færðu í kaf fjölmörg hús í Víetnam. Áður hafði fellibylurinn valdið stórflóðum í Manila, höfuðborg Filippseyja.

Heldur hafði þó dregið úr krafti fellibylsins þegar hann kom til Laos í gær.

gudsteinn@frettabladid.is