„Dýrs­legt“ morð í græn­lensku smá­þorpi

Málið varðar 49 ára gamlan mann sem fannst látinn í Kangaamiut 22. október 2025. Ákæruvaldið telur að mennirnir tveir hafi í sameiningu beitt fórnarlambið gróflegu ofbeldi og látið högg dynja á líkama og höfði, sem olli meðal annars fjölda rifbrota og broti á bringubeini. Sermitsiaq fjallar um málið.

Samkvæmt ákæruskjalinu er mönnunum einnig gefið að sök að hafa misþyrmt kynfærum fórnarlambsins, sem talið er hafa átt þátt í andlátinu. Verknaðurinn er sagður hafa átt sér stað að kvöldi þriðjudagsins 21. október 2025 fram á morgun miðvikudagsins 22. október.

Ekki liggur fyrir hvort mennirnir tveir muni játa manndráp eða neita sök. Verði þeir fundnir sekir fer ákæruvaldið fram á að þeir hljóti ekki skemmri refsingu en níu ára fangelssivist.

Báðir hinna ákærðu voru búsettir í Kangaamiut. Ekki hefur verið upplýst um tengsl þeirra á milli, né heldur hvaða tengsl þeir kunna að hafa haft við hinn látna. Mennirnir hafa setið í gæsluvarðhaldi frá því í október 2025.

Þriðji maður var einnig handtekinn og grunaður í málinu, en ákæruvaldið upplýsir að hann sæti ekki lengur grun.