Bikey að ganga í raðir Burnley

Varnarmaðurinn stæðilegi Andre Bikey hefur staðist læknisskoðun hjá nýliðum Burnley í ensku úrvalsdeildinni og því fátt sem kemur í veg fyrir að gengið verði frá félagsskiptum kappans frá Reading eftir að kauptilboð upp á 2,8 milljónir punda var samþykkt.

Knattspyrnustjórinn Brendan Rodgers hjá Reading viðurkennir að hann hefði helst viljað fá að halda Bikey en skilur að leikmaðurinn vilji spila í deild þeirra bestu til þess að auka möguleika sína á að komast í landsliðshóp Kamerún fyrir lokakeppni HM 2010.

„Hann er í mikilli baráttu um sæti í landsliði Kamerún og við getum ekki staðið í vegi fyrir honum því hann á meiri möguleika ef hann er að spila í úrvalsdeildinni," segir Rodgers í viðtali við Reading Post.