Cameron vill þingkosningar

Þingmenn Verkamannaflokksins í Bretlandi safna nú undirskriftum til að knýja á um að Gordon Brown, forsætisráðherra Bretlands og leiðtoga flokksins, víki. Talið er að framtíð hans í stjórnmálum geti ráðist af úrslitum Evrópu- og sveitastjórnakosningar sem fara fram í Bretlandi í dag. David Cameron, leiðtogi Íhaldsflokksins, vill að þing verði rofið og boðað verði til kosninga.

Kosið er til nokkurra sveitastjórna og Evrópuþingsins í Bretlandi í dag en Evrópuþingskosningar standa næstu fjóra daga í öllum 27 ríkjum ESB. Aðeins er kosið í Bretlandi og Hollandi í dag. Ekki er búist við mikilli kosningaþátttöku í nokkru ESB ríki, þar með talið Bretlandi, en þó er litið svo á að kosningarnar í dag geti ráðið miklu um framtíð Browns í embætti. Fari svo að Verkamannaflokkurinn gjaldi afhroð líkt og spáð er þá verði herði flokksbræður forsætisráðherrans sóknina gegn honum.

Tölvupósti var lekið í breska miðla í gær þar sem ónafngreindir þingmenn í Verkamannaflokknum hvetja flokksmenn til að skrifa undir bréf til Brown þar sem hann er hvattu til að víkja.

Þeir sem standa að bréfinu ætla ekki að koma fram undir nafni fyrr en fimmtíu hafa skrifað undir. Sjötíu þingmenn Verkamannaflokksins hið minnsta af nærri þrjú hundruð og sextíu á þingi geta knúið fram leiðtogakosningum í flokknum með því að útnefna annan þingmann sem leiðtoga.

Brown á í vök að verjast, ekki síst vegna kostnaðarhneykslisins þar sem upplýst hefur verið að þingmenn á breska þinginu hafa teygt reglur og jafnvel farið á svig við þær til að fá endurgreidd útgjöld sín af opinberu fé.

Tveir þungaviktarráðherrar í ríkisstjórn hafa sagt af sér í vikunni vegna málsins. Hazel Blears, ráðherra sveitastjórnarmála, í gær og Jacqui Smith, innanríkisráðherra, í fyrradag.

Verkamannaflokkurinn getur í síðasta lagi boðað til kosninga í byrjun maí á næsta ári. Síðustu kannanir benda til að Íhaldsmenn hafi þar ríflega tuttugu prósentustiga forskot á Verkamannaflokkinn.

Brown átti í vök að verjast í fyrirspurnartíma í gær. Nick Clegg, leiðtogi Frjálslyndra demókrata, sagði að Verkamannaflokkurinn væri búinn að vera og Frjálslyndir eða Íhalsmenn einu raunverulegu valkostirnir fyrir kjósendur.

David Cameron, leiðtogi Íhaldsflokksins, sagði að eina lausnin fyrir Brown nú væri að fara til drottningar og biðja um að þing yrði leist upp og boða síðan strax til kosninga.

Brown sagðist einfaldlega halda sinni vinnu áfram í efnahagskreppunni. Ringulreið yrði í landinu ef Íhaldsmenn kæmust til valda og myndu skera niður í opinberum útgjöldum á þessum erfiðu tímum.