Brown berst í bökkum

Breski forsætisráðherrann Gordon Brown á í vök að verjast þessa dagana en sótt er að honum úr öllum áttum, meðal annars vegna hins eldfima kostnaðarmáls sem heldur betur hefur hrist upp í breskum þingheimi undanfarnar vikur. Annar ráðherrann í ríkisstjórn Browns hefur nú sagt af sér en þar er um að ræða sveitarstjórnaráðherrann Hazel Blears. Í gær boðaði Jacqui Smith innanríkisráðherra brotthvarf sitt úr ríkisstjórninni og er nú svo komið að breskir fjölmiðlar keppast við að benda á ummerki þess að Brown sé að missa stjórnartaumana úr hendi sér.