Sex ár frá Kólumbíuslysinu í gær

Fánar voru dregnir í hálfa stöng í gær við Kennedy-geimferðamiðstöðina til að minnast geimfaranna sjö sem fórust þegar Kólumbía splundraðist í þann mund sem hún kom til baka inn í lofthjúp jarðar eftir ferðalag sitt en þetta er í eina skiptið í bandarískri geimferðasögu sem slys hefur orðið á heimleið.

Sex af geimförunum sjö voru bandarískir ríkisborgarar en sá sjöundi var Ilan Ramon, fyrsti ísraelski geimfarinn, sem flutti með sér handrit af tóra-lögmáli gyðinga. Ferjan sprakk í loft upp 16 mínútum fyrir áætlaðan lendingartíma í Flórída og dreifðist brak hennar yfir hluta Texas og Louisiana.

Lífseigasta kenningin um orsök slyssins er að brot úr einangrun eldsneytisgeymis ferjunnar, sem skall á öðrum væng hennar rétt eftir flugtak, hafi skemmt hitahlíf og ferjan þess vegna ofhitnað við að koma inn í lofthjúp jarðar.

Á miðvikudaginn í síðustu viku voru svo 23 ár liðin síðan systurferja Kólumbíu, Challenger, sprakk í loft upp við geimskot og sjö geimfarar létu lífið. Um borð í Challenger var einnig frumkvöðull en það var Christa McAuliffe, fyrsti kennarinn sem tók þátt í geimskoti.