Fundu flak af frægu orrustuskipi

Bandarískir fjársjóðsleitarmenn hafa fundið flakið af breska orrustuskipinu Victory sem fórst í fárviðri á Ermarsundi fyrir 264 árum. Skipið var forveri orrustuskipsins Victory sem var flaggskip Nelsons lávarðar í orrustunni við Trafalgar.

Alls voru sex skip smíðuð eftir sömu teikningum og voru þau talin meistaraverk skipasmíða á þeim árum.

Skipin voru 3500 tonn sem þótti mikið á þeim tíma. Þau voru vopnuð 102 fallbyssum og með um 850 manna áhöfn.

Bandarísku fjársjóðsleitarmennirnir hafa þegar náð nokkrum fallbyssum upp á yfirborðið. Þau bera skjaldamerki orrustuskipsins og því lítill vafi á að flak þess sé fundið.

Mest spenntir eru þeir þó fyrir fjórum tonnum af gullpeningum sem talið er að hafi verið um borð.

Flaggskip Nelsons er nú varðveitt í Portsmouth sem sjóminjasafn.