Mestu snjókomu í tvo áratugi spáð í Bretlandi

Spáð er mestu snjókomu í tvo áratugi um nánast allt Stóra-Bretland í dag. Almenningssamgöngukerfið í Lundúnum og víðar er nær algjörlega lamað vegna ofankomu.

Ekki er nóg með að allt að þrjátíu sentimetra djúpum jafnföllnum snjó sé spáð heldur gera veðurstofur landsins einnig ráð fyrir fimbulkulda alla vikuna. Það á við um England, Wales og hluta Skotlands. Í gær var Gatwick-flugveli og London City flugvelli lokað vegna veðurs en tafir urðu á umferð um aðra velli. Í dag eru tafir á ferðum til og frá Heathrow-flugvelli og búið að loka flugbrautum.

Erfiðlega gekk fyrir Lundúnarbúa að komast til vinnu í morgun. Það var bíll við bíl á helstu umferðaæðum borgarinnar. Engir strætisvagnar á ferð, fjölmörgum ferðum ofanjarðarlesta aflýst og miklar tafir á ferðum í neðanjarðarlestarkerfinu.

Fjölmargir skóla eru lokaðir í dag, grunn-, mennta- og háskólar.

Fólk er hvatt til að halda sig heima og vinnuveitendur horfa í gegnum fingur sér mæti fólk seint eða bara alls ekki.

Fjölmörg umferðaslys munu hafa orðið í Lundúnaborg í morgun vegna veðurs. Engin alvarleg slys munu þó hafa orðið á fólki.

Spáð er hríðarbyl í austurhluta Englands og í Lundúnum síðdegis og í norðurhluta Englands og austurhluta Skotlands í nótt.

Áætlað er að sú röskun sem verður á bresku þjóðfélagi næstu daga muni kosta um sex hundruð milljónir punda á dag jafnvirði nærri hundrað milljarða íslenskra króna á gengi Seðlabanka Íslands í dag.