Meira en 100 þúsund kólerutilfelli í Zimbabve

Spá Rauða krossins gerir ráð fyrir að að kólerutilfelli í Zimbabve fari yfir 100.000 á næstu dögum. Þó hefur dregið úr nýjum tilfellum að undanförnu en rúmlega 4300 íbúar hafa dáið vegna kóleru í Zimbabwe síðan í ágúst í fyrra.

Robert Mugabe, forseti landsins, hefur haldið því fram að Bretar hafi komið faraldrinum af stað. Nágrannaríki gripu í haust til ráðstafana á landamærum sínum að Zimbabwe til þess að reyna að koma í veg fyrir að smit bærist til þeirra.

Heilbrigðiskerfið í Zimbabwe er hrunið líkt og aðrir innviðir landsins. Það var því óhæft til þess að takast á við kólerufaraldurinn. Rauði krossinn hefur útvegað meira en hálfri milljón íbúa aðgengi að hreinu vatni frá því að aðgerðir samtakanna hófust í landinu í desember.