192 sentímetra Fídji-maður er markahæstur í undankeppni HM

Osea Vakatalesau er langt frá því að vera þekktasta nafnið í boltanum en þessi 23 ára og 192 sentímetra Fídji-maður hefur þó slegið öllum markaskorurum við í undankeppni HM. Vakatalesau skoraði tólf mörk fyrir þjóð sína í undankeppninni en það dugði þó ekki til að Fídji kæmist á HM í Suður-Afríku.

Vakatalesau leikur með liðinu Ba F.C. á Fídji-eyjum og er kallaður Ozzy. Hann hefur alls skorað 24 mörk í 11 landsleikjum. Helmingur marka hans í undankeppninni kom í 16-0 stórsigri á Tuvalu þar sem hann skoraði sex sinnum. Ozzy hefur skorað þessi tólf mörk í 9 leikjum.

Englendingurinn Wayne Rooney er markahæsti leikmaður í Evrópu en hann hefur skorað 8 mörk í fyrstu sjö leikjum Englendinga. Rooney hefur skorað einu marki meira en Edin Džeko frá Bosníu og David Villa frá Spáni. Eiður Smári Guðjohnsen var markahæstur Íslendinga með 3 mörk.

Markahæstu menn í undankeppni HM til þessa

Osea Vakatalesau, Fídji-eyjum 12

Moumouni Dagano, Búrkína Fasó 10

Luís Fabiano, Brasilíu 9

Seule Soromon, Vanuatu 9

Wayne Rooney, Englandi 8

Shane Smeltz, Nýja-Sjálandi 8

Joaquín Botero, Bólívíu 8

Sarayoot Chaikamdee, Tælandi 8

Maksim Shatskikh, Úsbekistan 8