Loka herstöð Bandaríkjanna í Kirgistan

Stjórnvöld í Kirgistan hafa ákveðið að loka herstöð Bandaríkjamanna í Mið-Asíuríkinu. Þetta var tilkynnt í morgun eftir að Rússar höfðu heitið Kirgistönum jafnvirði ríflega tvö hundruð og þrjátíu milljörðum íslenskra króna í efnahagsaðstoð. Herstöðin hefur verið mikilvæg fyrir aðgerðir Bandaríkjamanna og Atlantshafsbandalagsins í Afganistan. Þaðan hafa birgðir verið fluttar til hermanna sem há baráttu við Talíbana þar.

Bandarísk stjórnvöld segjast vona að hægt verði að halda herstöðinni opinni áfram þrátt fyrir yfirlýsingar morgunsins. Barack Obama Bandaríkjaforseti hefur lagt áherslu á aðgerðir í Afganistan frekar en Írak og ætlar að fjölga umtalsvert í herliðinu þar á næstu mánuðum.