Sendifulltrúi Obama mættur til miðausturlanda

Sérlegur sendifulltrúi Bandaríkjastjórnar kom til Egyptalands í morgun til fyrsta fundar um hvernig koma megi aftur í gagn friðarferlinu fyrir botni Miðjarðarhafs. Strax að loknum fundi hélt hann til Ísraels. Í nótt gerðu Ísraelar aftur árásir á Gaza-svæðið þrátt fyrir vopnahlé.

George Mitchell, sérlegur sendifulltrúi Baracks Obama Bandaríkjaforseta í Mið-Austurlöndum, kom til fundar við Hosni Múbarak Egyptalandsforseta í Kaíró í morgun. Egyptar hafa lengi reynt að miðla málum milli Hamas-liða á Gaza og Ísraela. Mitchell fer nú milli aðila í deilunni til að kanna hvernig landið liggur. Hans verkefni er að koma friðarferlinu aftur af stað. Mitchell er þrautreyndur samningamaður en honum er þakkað friðarsamkomulagið milli kaþólikka og mótmælenda á Norður-Írlandi.

Hann mun funda með Ehud Olmert forsætisráðherra Ísraels og Mahmoud Abbas forseta Palestínumanna en ekki með fulltrúum Hamas.

Árásir Ísraela hófust um miðjan dag í gær. Ísraelsher hefur sagt þær svar við vegsprengju sem herskáir Palestínumenn muni hafa komið fyrir en hún varð einum ísraelskum hermanni að bana og særði þrjá aðra.

Sprengjum var varpað á Khan Younis í suðurhluta Gaza. Herlið og skriðdrekar voru einnig sendir inn á svæðið og til bardaga kom. Einn Hamasliði féll. Herliðið var kalla aftur frá Gaza þegar leið á daginn en síðan var sprengjum varpað á göng sem láu frá Gaza til Egyptalands. Smyglgöng til að flytja vopn segja Ísraelar. Ein af fáum líflínum til íbúa á Gaza segja Palestínumenn enda landamærin lokuð í rúmt eitt og hálft ár og lítið um að nauðsynjar komist til Gazabúa.

Þrátt fyrir atburði gærdagsins segja Ísraelar vopnahlé enn formlega í gildi eftir þriggja vikna átök fyrr í mánuðinum sem kostuðu um þrettán hundruð Palestínumenn lífið, þar á meðal um fjögur hundruð börn. Á sama tíma féllu fjórtán Ísraelar.

Talsmaður Ísraelsstjórnar segir hins vegar að Palestínumenn grafi undan vopnahlénu með aðgerðum gegn Ísraelum og það eigi ekki að koma þeim á óvart ef Ísraelar víki frá því til að verja sig.