Öryggisgæsla Bretadrottningar brást

Talsmaður bresku konungsfjölskyldunnar segir að verið sé að rannsaka fréttir þess efnis að blaðamönnum frá slúðurblaðinu News of The World hafi tekist að komast inn í íbúð Elísabetar drottningar í Lundúnum.

Þeim hafi einnig tekist að setjast upp í bíl hennar eftir að hafa mútað bílstjóranum.

Blaðamennirnir dulbjuggu sig sem kaupsýslumenn frá Miðausturlöndum. Þeir borguðu bílstjóranum eittþúsund sterlingspund fyrir að komast framhjá öryggisgæslu konungsfjölskyldunnar.

Blaðið segir í forsíðufrétt um þetta mál að blaðamenn þess hafi verið að kanna öryggisgæsluna sem ekki þótti upp á marga fiska. Blaðamenn þess hefðu allt eins getað verið útsendarar Al Kaida.