Orð stendur gegn orði um málaferli Hollendinga

Höskuldur Þórhallsson, þingmaður Framsóknarflokksins, hafnar því alfarið að hafa farið með rangt mál þegar að hann skýrði frá því í gær að á fundi fjárlaganefndar Alþingis hefðu verið ræddar upplýsingar um að hollensk stjórnvöld myndu styðja við málaferli hollenskra innistæðueigenda. Eftir að Höskuldur sagði þetta sendi Indriði Þorláksson, aðstoðarmaður fjármálaráðherra og fulltrúi í samninganefndinni, frá sér yfirlýsingu um að þessar fullyrðingar væru rangar.

„Þetta kom skýrt fram á fundi fjárlaganefndar um morguninn. Það var tekið sérstaklega fram á fundi með skilanefnd og slitastjórn Landsbankans að það yrðu málaferli í uppsiglingu. Auk þess sem það kom fram á fundi með samninganefndinni þar sem voru ræddar fullyrðingar Icesave innistæðueigenda í Hollandi. Þannig að ég hafna því alfarið að hafa farið með rangt mál," segir Höskuldur.

Fréttastofa reyndi í morgun að ná tali af Guðbjarti Hannessyni, formanni fjárlaganefndar, en án árangurs.