Hollensk stjórnvöld munu styðja málsókn innistæðueigenda

„Það verður dómsmál út af neyðarlögunum og hollensk stjórnvöld hafa lýst því yfir að þau muni bakka upp slík málaferli af hálfu þarlendra innistæðueigenda," segir Höskuldur Þórhallsson, þingmaður Framsóknarflokksins. Hann segir að þetta hafi komið fram á fundi fjárlaganefndar í morgun.

Höskuldur segir að Íslendingar verði því að búa sig undir málaferli á næstunni og ef þau falli ríkinu í óhag sé þjóðin í afar miklum vanda. „Og þá er vont að vera búinn að binda sig í Icesave samningunum," segir Höskuldur.

Á fund fjárlaganefndar mætti samninganefnd íslenska ríkisins í Icesave málinu og skýrði frá því hvernig samningaviðræðurnar hefðu farið fram. Höskuldur segir að fram hafi komið í máli þeirra að enn væru gögn sem ekki væri búið að leggja fram heldur hefði samninganefndin lagt fram þau gögn sem samningamenn teldu að skiptu máli. „Ég sagði sagði að nefndin yrði að fá að meta það sjálf hvaða gögn skiptu máli," segir Höskuldur og á þá við fjárlaganefndina.

Þá mætti skilanefnd Landsbankans á fundinn og Höskuldur segir að nefndarmenn hafi útskýrt að þeir vissu ekki hve hátt hlutfall af eignum Landsbankans myndu renna til innistæðutryggingarsjóðs vegna þess að kröfulýsingarfrestur rennur ekki út fyrr en í september. Þegar nefndarmenn hafi óskað eftir því að fá yfirlit yfir eignirnar hafi skilanefnd borið fyrir sig bankaleynd.

Aðspurður segir Höskuldur að það muni velta á því hvort neyðarlögin halda eða ekki hversu hátt hlutfall af eignum bankans renni til innistæðutryggingarsjóðs. „Það enginn búinn að skoða eða undirbúa þá niðurstöðu sem myndi koma upp ef neyðarlögin halda ekki," segir Höskuldur. Hann segist vera þeirrar skoðunar að það sé gjörsamlega óábyrgt og stórhættulegt að Alþingi samþykki icesave samkomulagið þegar slíkar upplýsingar liggi ekki fyrir. „En maður skilur að Bretarnir vilji knýja á um samninginn svona fljótt því þeir vilja staðfesta greiðsluskylduna áður en reynir á neyðarlögin," segir Höskuldur.