Segir ekki rétt að hollensk stjórnvöld styðji málsókn

Indriði H. Þorláksson, aðstoðarmaður fjármálaráðherra og fulltrúi í samninganefnd Icesave segir það ekki rétt sem haft var eftir Höskuldi Þórhallssyni þingmanni Framsóknarflokksins hér á Vísi fyrr í dag.

Í fréttinni sem birtist á Vísi fyrr í dag segir Höskuldur að á fundi fjárlaganefndar í morgun hafi komið fram að hollensk stjórnvöld hafi lýst yfir að þau muni bakka upp málaferli þarlendra innistæðueigenda gegn íslenska ríkinu. Í fréttinni kom einnig fram að samninganefnd Ísland í Icesave málinu hafi verið á fundi nefndarinnar.

Indriði hefur nú sent frá sér yfirlýsingu vegna þessa. „Á fundi samninganefndarinnar með fjárlaganefnd kom fram sú spurning hvort vitað væri til þess að fyrirhuguð væri málaferli af hálfu hollenskra innstæðueigenda og þá hvort fyrir lægi að hollensk stjórnvöld myndu styðja slíka málssókn. Var því svarað til af samninganefndinni að búast mætti við slíkri málshöfðun en jafnframt að hollenska fjármálaráðuneytið hefði komið þeim upplýsingum á framfæri við íslenska fjármálaráðuneytið að hollenska ríkið myndi ekki standa að slíkum málaferlum," segir í yfirlýsingu Indriða.