Óttast afturhvarf til áttunda áratugarins

Fjöldi Bandaríkjamanna óttast að þjóðin sé á leið inn í nýja kreppu á borð við þá sem hófst haustið 1929. New York-búar óttast þetta síður, en þeirra ótti beinist að því að ástandið verði líkt því sem það var á áttunda áratug 20. aldarinnar.

Þá munaði minnstu að New York yrði gjaldþrota, glæpatíðni rauk upp og félagslega kerfið lagðist á hliðina með þeim afleiðingum að göturnar fylltust af heimilislausu fólki. Næstum því milljón manns yfirgáfu borgina þennan áratug vegna óaldarinnar og næstum því 20 ár liðu þar til New York-borg hafði rétt alveg úr kútnum á ný.