Tíu bjargað af flutningaskipi við Noreg

Tíu skipverjum var í dag bjargað af flutningaskipi frá Möltu sem strandaði í Harðangursfirði í Noregi. Mikill leki kom að skipinu og þótti vissast að áhöfnin yfirgæfi það. Farþegaskip sem var skammt undan Harðangursfirði heyrði neyðarkall frá maltneska skipinu og kom fljótt á vettvang.  Tvö norsk strandgæsluskip og þyrla voru einnig send á vettvang. Maltneska skipið var með timburfarm og ekki talið að það sökkvi í bili. Norska strandgæslan mun reyna að gera við það til bráðabirgða og koma því til hafnar.