King grét og meig á sig í fangelsinu

Varnarmaðurinn Ledley King hjá Tottenham, grét eins og barn þegar hann var lokaður inni í fangelsi vegna meintrar líkamsárásar um helgina.

Breska blaðið Sun náði sambandi við tvo menn sem voru staddir á lögreglustöðinni þegar King var leiddur þar inn í járnum og þeir sögðu varnarmanninn ekki hafa borið sig hetjulega.

"Ég hef aldrei séð mann haga sér svona undir áhrifum áfengis. Hann var með buxurnar á hælunum og var greinilega búinn að míga á sig. Hann gat varla staðið í lappirnar og þegar hann var ekki talandi var hann grátandi eins og smábarn," sagði sjónvarvottur.

"Ég svaf varla um nóttina fyrir látunum í honum og þegar við vorum látnir lausir daginn eftir leit hann hræðilega út og hlandlyktin var óbærileg. Hann talaði niður til lögregluþjónanna og tuðaði í sífellu um hvað hann væri með í laun," sagði viðmælandi Sun.