Tilkynningum um dýraníð fjölgar í Danmörku

Sífellt fleiri tilkynningar berast um vanrækslu eða ofbeldi gagnvart dýrum í Danmörku. Dönsku dýraverndasamtökin, Dyrenes Beskyttelse, segjast fá um 3 þúsund tilkynningar á ári og þeim hafi fjölgað um 31% á milli tveggja síðustu ára. Tilkynningarnar sem berast eru ólíkar, sumar um sakleysisleg mál en aðrar um mjög gróft ofbeldi. Talsmenn Dyrenes Beskyttelse segja að í einstaka tilfellum sé um að ræða mjög einbeittan vilja til ofbeldisverknaðar. Það á til dæmis við um eitt dæmið þegar að þrír drengir kveiktu í naggrís.

„Fólk veit í mörgum tilfellum ekkert um það hvernig á að fara með dýrin. Hugsunarleysi er líka vanræksla. Það er ótrúlega mikilvægt að þeir sem hafa dýrin á sölu passi upp á að segja kaupendunum hvernig á að hugsa um þau. Ef þú ert mest fyrir að kúra heima hjá þér áttu til dæmis ekkert að vera að fá þér hund sem þarf þriggja klukkustunda hreyfingu á dag," segir Gitte Staffeldt, blaðafulltrúi Dyrenes Beskyttelse.

Gitte segir þó að þrátt fyrir að tilkynningum um ofbeldi gegn dýrum fjölgi þýði það ekki endilega að Danir séu að verða ofbeldishneigðari. „Fólk er að verða meðvitaðara. Þegar fólk sér eða heyrir eitthvað þá er það tilkynnt til viðeigandi aðila," segir Gitte í samtali við Berlinske.