Tugir almennra borgara falla í Srí Lanka

Sameinuðu þjóðirnar segja fimmtíu og tvo almenna borgara hafa fallið í bardögum stjórnarhers og uppreisnarmanna Tamíltígra á Srí Lanka síðasta sólahring. Klasaskrpengja mun hafa skollið á sjúkrahús á bardagasvæðinu en sú bygging hefur orðið fyrir ítrekuðum árásum síðustu daga.

Talsmaður Sameinuðu þjóðanna segir að klasasprengja hafi skollið á sjúkrahúsi bænum Púthúkkúdíríuppú sem er á yfirráðasvæði Tígranna. Það svæði fer sífellt minnkandi um leið og sókn stjórnarhers herðist. Herinn segist ekki hafa gert árásir á sjúkrahúsið, uppreisnarmenn hefa ekki tjáð sig um málið.

Sameinuðu þjóðirnar segja fimmtíu og tvo almenna borgara hafa fallið í Sudanthírapúram í Mullatívu héraði þar sem tígrarnir eru enn með völdin. Áttatíu borgarar til viðbótar munu hafa særst.

Hart er barist á svæðinu. Mahinda Rajapaksa, forseti Srí Lanka, segir að innan fárra daga verði búið að ganga milli bols og höfuðs á tígrunum og þeirra samtök upprætt.

Talið er að um tvö hundruð og fimmtíu þúsund almennir borgarar séu fastir á átakasvæðinu og komist hvergi. Stjórnvöld hafa afmarkað griðarsvæði og segjast ekki geta tryggt öryggi borgara þar sem barist sé.

Hillary Clinton utanríkisráðherra Bandaríkjanna og breski starfsbróðir hennar David Miliband sögðu á blaðamannafundi í gær að vopnahlé yrði að taka gildi sem fyrst svo hægt verði að koma hjálpargögnum á svæðið. Stjórnvöld segja vopnahlé ekki koma til greina. Bardögum ljúki þegar tígrarnir verði sigraðir. Tamíltígrarnir segjast ekki leggja niður vopn fyrr en tryggt verði að þeir og aðrir Tamílar geti lifaði í landinu í friði og virðing þeirra og sjálfræði tryggt.

Tamíltígrar hafa barist fyrir sjálfstæðu ríki Tamíla síðan 1973 og hafa sjötíu þúsund manns fallið í átökum síðan þá.