Segir bónusa ekki vera til að verðlauna feigðarflan

Alistair Darling, fjármálaráðherra Bretlands, hvetur banka landsins til að hætta þegar í stað að greiða stjórnendum sínum ofurbónusa og svimandi há laun fyrir að sigla fjármálakerfinu í strand.

Darling sagði frá því, þegar hann skýrði frá væntanlegri rannsókn á hruni bankakerfisins, að hann hefði átt fund með stjórnendum Skotlandsbanka og beðið þá að endurskoða vandlega áætlun sína um að greiða stjórnendum bankans einn milljarð punda sem bónusgreiðslu eftir að bankinn hlaut 20 milljarða punda aðstoð úr ríkissjóði. Lagði Darling áherslu á að bónusar væru til að verðlauna góða frammistöðu, en ekki hrun.