Lyfjapróf niðurskurðartæki Breta í kreppunni

Lyfjapróf eru að verða æ algengari á breskum vinnustöðum í kreppunni. Þetta má merkja af því að eiturlyfjaráðgjafarmiðstöðinni Release bárust fjórfalt fleiri fyrirspurnir um lyfjapróf á vinnustöðum á fyrsta fjórðungi þessa árs en á sama tíma í fyrra.

Release sérhæfir sig í ráðgjöf um lög og reglur í tengslum við eiturlyf og eins því hve langt vinnuveitendur mega ganga í aðgerðum sínum vegna hugsanlegrar fíkniefnaneyslu starfsfólks. Einnig hefur verið nóg að gera hjá Concateno, fyrirtæki sem annast lyfjapróf á vinnustöðum.

Þetta tengja menn við kreppu og erfitt árferði hjá fyrirtækjum en hvernig er sú tenging komin til? Jú, þetta er í rauninni lúmsk sparnaðaraðgerð þar sem bresk lög gera ráð fyrir að hægt sé að segja starfsmanni upp vinnu án fyrirvara og einnig án þess að greiddur sé uppsagnarfrestur verði hann uppvís að fíkniefnaneyslu í vinnunni.

Release greinir frá því að helsta breytingin nú sé, að í stað þess að lyfjaprófin séu að mestu bundin við hættuleg störf þar sem menn stjórni stórvirkum vinnuvélum og öðrum háskalegum tólum og tækjum, séu það nú skrifstofu- og verslunarstörfin sem vaði í lyfjaprófum og síðast, en alls ekki síst, bankar landsins.