Bin Laden sótti um starf umsjónarmanns eyjaparadísar

Yfir 11.000 manns sóttu um stöðu umsjónarmanns ástralskrar paradísareyjar, þar á meðal Osama bin Laden.

Þeir eru sennilega ófáir sem gætu vel hugsað sér að starfa við ráðsmennsku á Hamilton-eyjunni úti við hið tilkomumikla Great Barrier-rif sem er stærsta vistkerfi kóralla í heiminum. Starfsfólki ferðaskrifstofunnar Tourism Queensland kom því ekki mjög á óvart að fá yfir 11.000 umsóknir um þetta draumastarf sem auglýst var undir titlinum besta starf í heimi.

Þeim kom hins vegar meira á óvart að meðal umsækjenda reyndist Osama nokkur bin Laden sem að auki hafði lagt fram nokkuð metnaðarfulla umsókn í myndbandsformi. Myndbandið er um 30 sekúndur og sýnir al-Qaeda-leiðtogann alræmda flytja ávarp. Ný hljóðritun hefur þó verið lögð yfir hina upprunalegu og greinir önnur rödd þar frá helstu kostum umsækjandans, til dæmis þeim að hann eigi auðvelt með samskipti, sé vanur að hafast við á sendnum svæðum og geti skipulagt stórviðburði.

Þótt ótrúlegt megi virðast náði umsóknin ekki inn í þann hóp sem ákveðið var að boða í viðtal og úrskurðuðu yfirmenn Tourism Queensland innihald hennar óviðeigandi. Starfið er raunverulega í boði en tilgangur auglýsingarinnar er þó öðrum þræði að lokka gesti til Hamilton-eyjar.