Mótmælt sjötta daginn í röð

Búist er við fjölmennum mótmælum í Íran sjötta daginn í röð vegna úrslita forsetakosninga þar í landi fyrir tæpri viku. Byltingarráðið í Íran hefur kallað frambjóðendurna þrjá sem biðu ósigur til að bera vitni fyrir helgina vegna rannsóknar á ásökunum um kosningasvik.

Forsetaframbjóðandinn Mir Hossein Mousavi sem varð annar í forsetakjörinu fyrir tæpri viku hvatti í dag stuðningsmenn sína til að halda áfram mótmælum en með friðsömum hætti.

Mousavi krefst þess að kosið verði aftur og sakar Mahmoud Ahmadinejad, endurkjörinn forseta, og fylgismenn hans um kosningasvik.

Í morgun bað hann stuðningsmenn sína um að taka þátt í göngu eða mætt í moskur í dag og minnst þeirra átta sem hefðu fallið í átökum í mótmælum á mánudaginn.

Þar er Mousavi talinn vilja bjóða Ali Khamenei æðsta klerk Írans byrginn en hann mun flytja tölu við föstudagsbænir í dag. Þar er búist við að biðli til þjóðarinnar að sýna stillingu.

Búist er við að fleiri taki þátt í aðgerðum stjórnarandstæðinga í dag en í gær en þá er talið að mótmælendur hafi verið einhvers staðar á bilinu 70 til 500 þúsund. Erlendum fréttamiðlum er gert afar erfitt að flytja fréttir af mótmælunum og fréttamönnum þeirra bannað að fylgjast með þeim. Nokkrir hafa verið handteknir.

Greint var frá því í morgun að byltingarráðið í Íran sem rannsaka mun ásakanir um kosningasvik hefði kallað Mousavi og hina tvo frambjóðendurna sem lutu í lægra haldi fyrir Ahmadinejad, þá Mohsen Rezai og Mehdi Karroubi til að bera vitni. Í yfirlýsingu segir að ráðið hafi byrjað að kanna nærri 700 umkvartanir frá frambjóðendunum og öðrum um framkvæmd kosninganna. Fyrr í vikunni tilkynnti ráðið að atkvæði í nokkrum kjördæmum yrði talin aftur en ekki yrði kosið upp á nýtt.